Գիրք՝ Newmag-ի հրատարակության: Կազմը՝ կոշտ, 292 էջ:
Անթերի մաշկով մոդելները և գեղեցկության չգրված ստանդարտները շատերի համար բարդույթների և ցածր ինքնագնահատականի պատճառ են: Հենց այդ պատճառով էլ կարծրատիպերը կանանց ստիպում են իրենց մաշկի խնամքի վերաբերյալ երբեմն չկշռադատված և գիտական բավարար հենք չունեցող որոշումներ ընդունել: Եթե մի կողմ թողնենք էսթետիկան, սա առաջին հերթին կարող է վնասել առողջությունը: Համացանցում հազարավոր մարդիկ մաշկի խնամքի տասնյակ հազարավոր տարբերակներ են առաջարկում: Ավանդական մեթոդներից մինչև տնային պայմաններում պատրաստած քսուքներ, աստղաբաշխական արժեքով շիճուկներից մինչև եզակի բույսերի համադրումներ: Բժշկության հետ կապ չունեցող մարդը դժվար հասկանա, թե սրանցից որն է օգտակար, որը՝ վնասակար: Փորձառու մաշկաբան Անջալի Մահտոյի գիրքը հստակ, հակիրճ, գիտական փաստերով և անձնական օրինակներով պատասխանում է մաշկի խնամքին վերաբերող բոլոր հարցերին: Տեղեկահորձանքի, իրարամերժ խորհուրդների և ոչ մասնագիտական կարծիքների ֆոնին այս գիրքը սպառիչ և հիմնավորված պատասխաններ է տալիս մաշկի կառուցվածքի, հատուկ խնդիրների և կանոնավոր խնամքի մասին: Այս գիրք-ուղեցույցն ամփոփում է ոլորտային ամենաթարմ հետազոտությունները և համադրում դրանք գործնականում կիրառված, մշտապես հաջողված և գիտության վրա հիմնված մեթոդների հետ:
Դոկտոր Անջալի Մահտոն (ծնվ. 1980 թ.) բժշկական կրթություն է ստացել Ուելսի համալսարանում, որն ավարտել է 2004-ին: Կարիերայի սկզբում որոշել է մասնագիտանալ մաշկաբանության մեջ: Կրթություն է ստացել նաև դեղագիտության ոլորտում: Անջալի Մահտոն 17 տարվա աշխատանքային փորձ ունի: Ակադեմիական կրթությանը զուգընթաց փորձ է ձեռք բերել Միացյալ Թագավորության առաջատար բժշկական կենտրոններում: Անջալի Մահտոն մաշկի խնամքի բրիտանական խոշորագույն կազմակերպության՝ British Skin Foundation-ի խոսնակն է, Բրիտանական Կոսմետիկ Մաշկաբանների գործադիր կոմիտեի անդամ: Անջալի Մահտոն բազմաթիվ գիտական հոդվածների և աշխատությունների հեղինակ է, միջազգային գիտակրթական կոնֆերանսների բանախոս: