Գիրք «Հայրենիք»

Գիրք՝ Newmag-ի հրատարակության: Կազմը՝ կոշտ, 624 էջ: Ֆերնանդո Արամբուրուն «Հայրենիք» վեպը գրել է, երբ բասկյան ETA ահաբեկչական խմբավորումը հայտարարել է զինված պայքարը դադարեցնելու մասին։ Գրողը ցանկացել է պարզել, թե այդ ողբերգական ժամանակաշրջանում ի՞նչ է պատահել մարդկանց հետ, ինչո՞ւ էին շատերն աջակցում սպանություններին, համակրում բռնարարներին։ Ինչո՞ւ էին երկչոտաբար լռում նրանք, ովքեր համաձայն չէին: Վեպի առանցքում երկու բասկ ընտանիքների հարաբերություններն են Սան Սեբաստիանի արվարձանում։ Արամբուրուն, ինքն էլ ծնված լինելով այստեղ, ներկայացնում է անկախության համար պայքարի ահաբեկչական մեթոդները, որոնք թշնամություն են սերմանում երկու մտերիմ ընտանիքների միջև և խեղում են շատերի ճակատագրերը։ Նաև ցուցադրում է իսպանական կենտրոնական իշխանության դաժան պատասխանը բասկերի բարձրացրած խնդիրներին։ Հեղինակը հակամարտության որևէ կողմին չի արդարացնում կամ դատապարտում։ Նա ի ցույց է դնում մարդկանց ողբերգությունն ու դա հաղթահարելու ճանապարհը։
Ֆերնանդո Արամբուրուն (ծնվ. 1959 թ.) իսպանացի գրող է, տասնյակ վեպերի, բանաստեղծական ժողովածուների հեղինակ, մանկագիր, բազմաթիվ մրցանակների դափնեկիր։ Արամբուրուն ավարտել է Սարագոսայի համալսարանի բանասիրության ֆակուլտետը։ 1985-ից ապրում է Գերմանիայում, որտեղ դասավանդում է իսպաներեն։ «Հայրենիք» վեպն Արամբուրուին համաշխարհային ճանաչում է բերել։ 2016-ին լույս տեսած գիրքը դարձել է վերջին տարիների գրաքննադատական գլխավոր իրադարձությունը Իսպանիայում։